ՀԱՄԱԳՈՐԾԱԿՑՈՒԹՅԱՆ ՀՐԱՎԵՐ
(Մայր Աթոռ Ս․ Էջմիածնում հիմնվել է աստվածաբանական օտարալեզու հանդես)
Մայր Աթոռ Սուրբ Էջմիածնի գործունեության մեջ կարևոր տեղ է զբաղեցնում հրատարակչական ոլորտը։ Այս ոլոտում կարևոր ուղղություն է պարբերականների և պաշտոնաթերթերի հրատարակությունը։ 19-րդ դարի երկրորդ կեսից սկսած Ս․ Էջմիածինն ունի հաջողված փորձառություն գիտական և հանրամատչելի պարբերականներ հրապարակելու գործընթացներում։ Մայր Աթոռ Ս․ Էջմիածնի կողմից առ այսօր հրատարակվող ամսագրերն ու թերթերը հայալեզու պարբերականների շարքերում ունեցել են և ունեն բացառիկ դեր՝ հատկապես հայագիտության զարգացման դիտանկյունից։ Սակայն դրանցից որևէ մեկը ժամանակակից գիտաչափության պահանջների տեսանկյունից միջազգային չէ։
Ուստի, Ն․Ս․Օ․Տ․Տ․ Գարեգին Բ Ամենայն Հայոց Կաթողիկոսի օրհնությամբ, Մայր Աթոռ Ս․ Էջմիածնի հրատարակչական բաժնի ենթակայության ներքո հիմնվել է նոր օտարալեզու (անգլերեն, ֆրանսերեն, գերմաներեն և ռուսերեն) հանդես՝ “Etchmiadzin” Journal of Theology and Religious Studies, որը կներառի միայն գիտական հոդվածներ՝ դառնալով Հայ Առաքելական Եկեղեցու օտարալեզու աստվածաբանական և կրոնագիտական հանդեսը (թեմատիկ շրջանակը), որի նպատակն է ապագայում ներառվելու միջազգային վարկանիշ ունեցող գիտական պարբերականների շտեմարաններում (մասնավորապես՝ Scopus, Clarivate Analitycs (Web of Science) և այլն)։
Վեհափառ Հայրապետի օրհնությամբ ձևավորվել է խմբագրակազմ և խմբագրական խորհուրդ։
Խմբագրությունը հրավիրում է բոլոր աստվածաբաններին և կրոնագետներին՝ թղթակցելու նշված պարբերականին։
Հանդեսի հրատարակչական քաղաքականության, հոդվածների կառուցվածքի, չափորոշիչների և ներկայացման մասին մանրամասն կարող եք տեղեկանալ հանդեսի etchmiadzinperiodical.org կայքում։
Խմբագրություն
Լույս է տեսնում Գևորգյան Հոգևոր Ճեմարանի գիտական խորհրդի որոշմամբ